O coelliño branco (formato grande)

Un dos libros máis emblemáticos de Kalandraka, nun formato grande ideal para contar e compartir.

Ao regresar de recoller coles na horta para facer un caldo, o pequeno coello branco encontra a súa casa ocupada pola terrible cabra cabresa. Tras pedirlle axuda a varios animais máis grandes ca el sen obter bos resultados, será só o máis diminuto de todos quen se atreva a enfrontarse á malvada cabra.

“O coelliño branco” é unha adaptación de Xosé Ballesteros a partir dun conto popular portugués, con ilustracións de Óscar Villán, quen por este traballo obtivo en 1999 o Premio Nacional de Ilustración. Trátase dun texto-fórmula concibido tanto para ser lido como para ser contado e que xoga de forma especial coa sonoridade e coa rima. Unha historia sobre a amizade e a coraxe que mostra que a valentía non é cuestión de tamaños.